La 10-an de decembro kolektiĝis nia klubo lastfoje en tiu-ĉi jaro. Nun Amelie invitis nin al sia loĝejo kaj ni estis entute ok membroj kiuj povis ĝui ŝian gastigemon kaj ŝiajn bongustajn frititajn pomojn, kiuj estis plenigitaj kun diversaj dolĉaĵoj kaj spicoj, laŭ germana kristnaskfesta tradicio.
Ĉi-foje Geir Arne prelegis pri la keĉua lingvo, kaj ĉefe pri ĝia ĉanka dialekto. Tio kompreneble estis por ni ĉiuj tute nekonata teritorio. Li montris ankaŭ kelkajn kantojn en tiu lingvo kaj rakontis pri similecoj inter la ĉanka kaj Esperanto.
Laŭ la tradicio, ni skribis kelkajn kristnaskajn salutkartojn al niaj malnovaj membroj kaj al aliaj amikoj kaj ni diskutis pri diversaj planoj por la venonta jaro.
Blogis en Senkategoria | Leave a Comment »
La 19-an de novembro NEL organizis seminarion per skajpo. El nia klubo sep membroj kolektiĝis por sekvi la prelegon de Lu Wunsch-Rolshoven, kiu el Berlino parolis pri tio, kiel informi pri Esperanto publike. Poste Otto Prytz parolis pri la historio kaj defio de la ekzamensistemo en Norvegio.
Bonŝance la tekniko bone funkciis, kaj ni povis pasigi tiun sabatan posttagmezon kaj agrable kaj utile. Post la seminario ni ankoraŭ restis ĉirkaŭ la tablo manĝante bongustaĵojn kaj babilante pri diversaj temoj.
Blogis en Senkategoria | Leave a Comment »
La 23-an de oktobro ni havis kunvenon kun rekorde multe da partoprenantoj. Ni estis 13 kiuj kolektiĝis ĉirkaŭ la tablo, kaj ni tre ĝojis pro tio, ke Geir Arne denove fariĝis tiom sana, ke li povas veni al la kunvenoj.
Ni havis multe da programeroj: Mario prelegis iom pri Toki pona, Geir Arne rakontis vortludojn kaj Claude legis longan raport-leteron de pola esperantisto, kiu vizitis Norvegion. Bedaŭrinde neniu el la klubo havis la okazon renkonti lin, ĉar dum la somero multaj estis forvojaĝintaj, sed lia letero estis tamen tre interesa.
En nia klubo estas nuntempe multaj muzikantoj, do ne estas strange, ke ĉifoje ni havis etan koncerton kiel fermo de la kunveno.
Blogis en Senkategoria | Leave a Comment »
La 29-an de septembro nia klubo organizis komunan viziton al la urba teatro Hålogaland Teater kaj spektis tie teatraĵon Landstrykere, bazitan sur romano de la fama norvega verkisto Knut Hamsun. La vespero fariĝis tre sukcesa, ne nur pro la kvalito de la prezentado, sed ankaŭ pro tio, ke ni, kun niaj membroj kaj familianoj okupis ne malpli ol 12 seĝojn. Eble tio komuna vizito al la teatro povus fariĝi ia tradicio ĉiujara por nia klubo.
Blogis en Senkategoria | Leave a Comment »
Dimanĉe, la 18-an de septembro ni havis nian unuan klubkunvenon dum la aŭtuno. Ni ne havis iun specialan temon, sed ĉiuj povis konatiĝi kun Anna, kiu estas interŝanĝ-lernanto el Francio, kaj pasigos tutan jaron en Tromsø. Ŝi parolas tre bone Esperante. Krom tio Claude parolis pri la franca eduka sistemo, kion la multaj ĉeestantoj interesiĝante aŭskultis.
Blogis en Senkategoria | Leave a Comment »
Sabate, la 10-an de septembro nia klubo denove havis informbudon en la urbocentro. Ĉifoje oni aranĝis la tagon de volontuloj, Frivillighet i sentrum, kaj multaj organizoj prezentis sin kaj informis la publikon pri siaj aktivadoj en belega, sunbrila vetero.
Blogis en Senkategoria | Leave a Comment »
Sabate la 11-an de junio ni havis informbudon en la urbocentro, en la kadro de Internacia semajno. Bedaŭrinde la urbodomo nun ne multe reklamas pri tio, kaj nur kelkaj organizoj partoprenis tiun aranĝon. Tamen ni tiel povis prezenti Esperanton al interesiĝantoj, kiuj pasigis sian tempon en la centro de la urbo.
Post la deĵorado ĉe la informbudo ni iris al la nova loĝejo de Amelie, kie Claude havis prelegon pri la partopreno de rusaj soldatoj en la unua mondmilito en Francio. Tio estis ankaŭ la temo de lia majstra ekzameno, kaj do ne estis mirinde, ke ni ricevis interesajn kaj abundajn informojn pri tiu ĉi temo. Bedaŭrinde ni nur kvarope ĉeestis tiun kunvenon kaj povis ĝui, krom la prelego, ankaŭ bongustan tagmanĝon de Amelie.
Blogis en Senkategoria | Leave a Comment »
